வாழும் தமிழ்க் கவிஞர்கள்

சென்னை ஒய்.எம்.சி.ஏ.பட்டிமன்றத்தில்
பேராசிரியர் மறைமலை இலக்குவனார் 'வாழும் தமிழ்க்கவிஞர்கள்'எனும் த்லைப்பில் பாரதிதாசன் மரபுக் கவிஞர்களைப்பற்றிய தொடர்பொழிவு நிகழ்த்திவருகிறார்.தொண்ணூற்றிரண்டாம் (92) பொழிவாக
“எழிலன் கவிதைகள்” என்னும் தலைப்பில் 11/3/2008 அன்று பொழிவு நிகழ்த்தினார்.இதற்குத் தலைமை தாங்கியவர் கவிஞர்.வாசல் வசந்தப்பிரியன் ஆவார்.இவர் ‘வாசல்'என்னும் அமைப்பின் மூலம் ஒவ்வொரு திங்களும்
பல்வேறு கவிஞர்களை அரங்கேற்றி வருபவர் என்பது குறிப்பிடத்தக்கது.
தமது தலைமையுரையைக் கவிதையாகவே இவர் வழங்கினார்.
மறைமலை இலக்குவனார் தமது ஆய்வுரையில் எழிலன் இயற்றிய
கவிதைகளின் தொகுப்புநூல்கள் மூன்றினையும் விரிவாக ஆய்வு செய்தார்.
திருக்குவளைத் தேனமுது, நம்பிக்கை நாதம், தேடிவரும் தென்றல் என்னும் தொகுப்புகளில் இடம்பெற்றுள்ள பல்வேறு கவிதைகளின் நலம்பாராட்டிப் பேசினார்.தமது கவிதைகளில் இயைபுத்தொடையைச் சிறப்பாக எழிலன் அமைத்துள்ளார் எனக் கூறி அதற்குப் பல்வேறு சான்றுகளை அவரது
கவிதைகளிலிருந்து எடுத்துக்காட்டினார்.அரசு ஊழியர் வேலைநிறுத்தத்தின் போது எழிலன் படைத்த கவிதைகளைப் பாராட்டி அவரது சமுதாயச்சிந்தனைகளையும் விரிவாக அவரது கவிதைகளின் மூலம் விளக்கினார்.குமரிச்செழியன் வரவேற்புரையும் பட்டிமன்றச்செயலாளர் பக்தவத்சலம் அவர்களின் நன்றியுரையும் விழாவுக்கு மேலும் மெருகூட்டும் வகையில் அமைந்தன.

அறிஞர் கோ.முத்துப்பிள்ளை தமிழ் ஆட்சிமொழியாகச் சிறப்புடன் செயற்படத்
தமது பணிக்காலத்திலும் ஓய்வு பெற்றபின்பும் கடுமையாக உழைத்தவர்.பல ஆட்சித்துறைச்சொற்களை உருவாக்கியவர்.அரசு அலுவலர்களுக்குப் பாடம் நடத்தித் தமிழில் ஆணைகளும் வரைவுகளும் வருதற்குக் காரணமாக விளங்கியவர்.இவர் இலக்கணம் பயிற்றும் விதம் ஒரு தனிச்சிறப்பு வாய்ந்தது.நகைச்சுவை மிளிர எளிமையாகக் கற்றுக்கொடுப்பதால் எவ்வித அச்சமும் தயக்கமும் இன்றித் தமது பிழைகளை அலுவலர்கள் திருத்திக்கொள்ள வழிகாட்டுவார்.

இவர் அளித்த ஊக்கத்தினால் பலர் புதிய கலைச்சொற்களை உருவாக்கியளித்துள்ளனர்.
தமிழ் இலக்க்யங்களை இனிய எளிய தமிழில் மக்கள் மனங்கொள்ளும் வகையில் பொழிவாற்றிப் பரப்பியவர்.கடல்கடந்து தமிழர்கள் வாழும் இடங்களுக்கெல்லாம் சென்று தமிழ் பரப்பிய பெருமை மிக்க பெரும்புலவர்.
தொண்ணூறு அகவை நிறைந்த இப்பெரியாரை,வியாசர்பாடி,மாக்கவி பாரதிநகரில் அமைந்துள்ள,அவரது இல்லத்திற்குச் சென்று சந்தித்தோம்.
கவிஞர் வே.குணசேகரன் அவரது எழில் கலை மன்றத்தின் சார்பில்
இச்சந்திப்பிற்கு ஏற்பாடு செய்திருந்தார்.
அனைவரையும் இன்முகத்துடன் வரவேற்ற அப்பெரியார்,தமிழ்த்தொண்டு
ஆற்றுவதில் தளர்ச்சிகொள்ளாது தொடர்ந்து அப்பணியை அவரவர் சூழலுக்கேற்றவாறு ஆற்றிவரவேண்டுமெனக் கேட்டுக்கொண்டார்.
ஊடகங்கள் தமிழுக்கு இழைத்துவரும் தீங்கினை எடுத்துரைத்து,மக்கள்
தமிழறிவும் தமிழுணர்வும் பெற ஆவன செய்யுமாறு எங்கள் அனைவரையும் வேண்டினார்.

இந்த வலைப்பூ தமிழ் நிகழ்ச்சிகளைத் தொகுத்துத் தரும் நோக்கம் உடையது.

முதல் நிகழ்வாகத் தமிழறிஞர் கோ.முத்துப்பிள்ளை அவர்களைச் சந்தித்த

மகிழ்ச்சி மிக்க நிகழ்வு இடம் பெறுகிறது.